Fo-Ionadan Ionnsachadh Proifeiseanta
Bidh an t-Ionad Sàr-Mhathais ann an Teagasg ag obrachadh tro lìonra nàiseanta de Fo-ionadan Ionnsachadh Phroifeiseanta air feadh Alba. Thèid na trì prìomh fo-ionadan roinneil an gnìomh san Lùnastal 2025, le trì fo-ionadan cuspaireil, a’ togail air builean ar suirbhidh nàiseanta, gan cur air bhog bhon Fhaoilleach 2026.
Le chèile, cuiridh na fo-ionadan seo co-obrachadh roinneil an comas, agus aig an aon àm cuiridh iad ri prògram nàiseanta de theagasg proifeiseanta a tha bonntaichte air rannsachadh a chaidh a stiùireadh le tidsearan.
Cuiridh gach fo-ionad taic ri:
- Ionnsachadh proifeiseanta agus feòrachadh dreuchdail a tha freagairt air an sgìre
- Coimhearsnachdan cleachdaidh cuspaireil
- Cothroman do thidsearan a dhol an sàs ann an rannsachadh agus ann an conaltradh ri chèile
’S ann aig ìre dealbhachaidh agus leasachaidh a tha sinn an-dràsta, le toiseach-tòiseachaidh gnìomhachd nam fo-ionadan san Lùnastal 2025, agus tachartasan co-obrachaidh nàiseanta a’ dol chun Mhàirt 2026.
Cumaidh sinn fios ribh mu na fo-ionadan, agus ciamar a thèid sibh an sàs san obair aca, tron làrach-lìn agus air na meadhanan sòisealta againn.
Tro na Fo-ionadan Ionnsachadh Proifeiseanta, gheibh tidsearan cothroman a dhol an sàs ann an rannsachadh ann an diofar dhòighean. Bidh ceannardan fo-ionaid ag obair còmhla ri tidsearan gus obair shònraichte an ionaid a dhealbhachadh agus a leasachadh a-rèir feumalachdan an luchd-teagasg. Dh’fhaodadh na leanas, cho math ri gnìomhan eile, a bhi an lùib seo:
- Mion-fhiosrachaidhean rannsachaidh: Togaidh mion-fhiosrachadh rannsachaidh air rannsachadh eadar-nàiseanta a thaobh prìomh amas an fho-ionaid. Thèid gach mion-fhiosrachadh a sgrìobhadh le aire air tidsearan, a’ piobrachadh cnuasachadh agus a’ fosgladh chothroman air rannsachadh a bharrachd, cho math ri cur an gnìomh ann an cleachdadh.
- Còmhraidhean proifeiseanta agus panailean deasbaid fìor-eòlaichean: A’ gabhail a-steach seiseanan beò, aghaidh ri aghaidh, air-loidhne, measgaichte, co-thìmeach agus neo-co-thìmeach air cuspairean anns am biodh ùidh a-rèir cuspair an fho-ionaid.
- Comas coimhearsnachdan cleachdaidh a chruthachadh: Thèid coimhearsnachdan cleachdaidh a chruthachadh ma choinneamh ceistean, gnìomhan agus/no duilgheadasan sònraichte a thèid a chomharrachadh leis gach fo-ionad. Bidh diofar chruthan air coimhearsnachdan cleachdaidh. Bi buidhnean ann a bhios a’ coinneachadh aghaidh-ri-aghaidh taobh a-staigh com-pàirteachas cleachdaidhean-rannsachaidh san sgìre anns a bheil gach fo-ionad air a stèidheachadh. Bidh buidhnean ann a tha gu tur air-loidhne a tha co-thìmeach, neo-cho-thìmeach no measgaichte nan dòighean obrach. Bidh cuid rim faighinn taobh a-staigh gnìomh ionnsachaidh eagraichte eile, leithid cùrsa co-thìmeach no neo-cho-thìmeach.
- Buidhnean rannsachaidh luchd-cleachdaidh thar ùine air teagasg, ionnsachadh agus measadh ceangailte ri cuspair an fho-ionaid. ’S e coimhearsnachdan cleachdaidh sònraichte a th’ ann am buidhnean rannsachaidh luchd-cleachdaidh, a thèid a chur ri chèile anns na diofar dhòighean a chaidh an ainmeachadh gu h-àrd.
Prìomh Fo-ionadan
Prìomh Fo-ionad Rannsachaidh le aire air Teagaisg
Tha am Prìomh Fo-ionad Rannsachaidh le aire air Teagaisg ri lorg ann an Sgoil Fhoghlaim Oilthigh Ghlaschu (Campas Ghilmorehill). Tha e a’ toirt taic do na fo-ionadan eile air fad le bhith a’ cruthachadh stuthan teagaisg, a’ cur ghnìomhachdan an comas, agus a’ toirt taic ro-innleachdail do obair rannsachaidh an ISMT. Tha mion-fhiosrachaidhean rannsachaidh, panailean agus seiseanan fìor-eòlaichean, agus tachartasan, a’ cur cuideam air leasachadh a dhèanamh air, agus taic a thoirt do, chom-pàirteachas chleachdaidhean-rannsachaidh. Tha coimhearsnachdan cleachdaidh gan cur air bhonn gus taic a chur ri obair rannsachaidh thidsearan, tha sgrùdadh luchd-cleachdaidh a’ cur cuideam air dol an sàs ann an rannsachadh, agus a’ cur an comas fiosrachadh agus builean a cho-roinn thairis air na fo-ionadan air fad.
Seiseanan fìor-eòlaichean, oideachaidhean-lìn, agus gnìomhachdan:
- Ullachadh ma choinneimh agus dol an sàs ann an rannsachadh luchd-cleachdaidh
- Ceannardas ro-innleachdail a bheir taic do thidsearan a tha an sàs ann an rannsachadh
- Com-pàirteachas thidsearan ann an rannsachadh: fianais bhon chlas
- A’ co-roinn toraidhean rannsachaidh
Comas air coimhearsnachdan cleachdaidh: Tha coimhearsnachdan cleachdaidh a’ sgrùdadh mar as urrainnear rannsachadh a lorg, a cho-chur agus a chleachdadh ann am planadh leasanan, ann an teagasg agus ann am measadh. Tha am fo-ionad cruthach a’ leasachadh ghnìomhachdan taobh a-staigh na com-pàirteachaidhean a tha mar thà stèidhichte leis ann an Glaschu agus an Taobh Siar na h-Albainn.
Tha aire buidhnean rannsachaidh luchd-cleachdaidh thar ùine air ciamar a chleachdas tidsearan rannsachadh gus duilgheadas cleachdaidh sònraichte a leasachadh, agus ciamar a bheir ceannardan-sgoile taic do thidsearan gus rannsachadh a dhèanamh agus a chleachdadh.
Prìomh Fo-ionad Foghlam Dùthchail agus Ionnsachadh chum Seasmhachd
Tha Prìomh Fo-ionad Foghlam Dùthchail agus Ionnsachadh chum Seasmhachd ri lorg ann an Sgoil Sheasmhachd Sòisealta agus Àrainneachail Oilthigh Ghlaschu (Campas Dhùn Phrìs). Tha e a’ toirt taic aghaidh-ri-aghaidh agus didsiteach dha tidsearan ann an sgìrean dùthchail na h-Alba gus a dhol an sàs ann an rannsachadh agus a chleachdadh tro sgrùdadh neach-cleachdaidh, coimhearsnachdan cleachdaidh agus com-pàirteachas cleachdaidhean-rannsachaidh. Thèid podcastan, oideachaidhean-lìn, blogan thidsearan agus deasbadan panail a chleachdadh gus builean rannsachaidh agus cleachdaidhean ùr-ghnàthach ann am foghlam dùthchail agus Ionnsachadh chum Seasmhachd a sgaoileadh. Tha am fo-ionad a’ strì gus dèanamh cinnteach gu bheil obair an Ionaid so-ruigsinn agus freagarrach dha tidsearan a tha ag obair ann an suidheachaidhean dùthchail agus eileanach.
Prìomh Fo-ionad Foghlam Gàidhlig
Tha am Fo-ionad Foghlam na Gàidhlig ri lorg ann an Sabhal Mòr Ostaig san Eilean Sgitheanach, agus tha e a’ toirt taic - aghaidh ri-aghaidh agus air-loidhne - agus gnìomhachd a tha bonntaichte air rannsachadh do thidsearan air feadh na h-Alba a tha ag obair ann am foghlam Gàidhlig. Le cuideam air rannsachadh nàiseanta agus eadar-nàiseanta a thaobh foghlam bogaidh, bidh mion-fhiosrachadh rannsachaidh, coimhearsnachdan cleachdaidh, còmhraidhean proifeiseanta agus com-pàirteachas rannsachaidh gan tabhann, a’ cur taic ri pàirt a ghabhail ann an sgrùdadh le luchd-cleachdaidh agus fianais a sgaoileadh am measg luchd-dreuchd eile gus builean foghlam Gàidhlig a thoirt am feabhas. Tha am fo-ionad cuideachd ga dhèanamh nas fhasa faighinn gu stuthan ann an Gàidhlig ceangailte ri rannsachadh a thèid a chruthachadh leis na fo-ionadan eile.
Tachartasan ri thighinn sna Prìomh Fo-ionadan
- A’ cur dòighean-obrach ISMT a thaobh ionnsachadh proifeiseanta an cèill: Còmhradh proifeiseanta am measg ceannardan ISMT: an t-Ògmhios 2025
- Rannsachadh an neach-cleachdaidh mar dhòigh air fèin-sgrùdadh agus cur an gnìomh: deasbad panail fìor-eòlaichean, an t-Ògmhios 2025
- Rannsachadh an neach-cleachdaidh agus buidhnean de choimhearsnachdan cleachdaidh: A’ toirt taic do thidsearan gus dol an sàs ann an rannsachadh: clàradh a’ tòiseachadh aig deireadh an Ògmhios 2025; cùrsaichean a’ tòiseachadh san t-Sultain 2025